ಪರದೇಶಿ ಪರಭಾಷಿ ಅಭಿಮಾನಿ

ಪರದೇಶಿ ಪರಭಾಷಿ ಅಭಿಮಾನಿ ಬಿಗುಮಾನಿ 

ಸ್ವದೇಶಿ ಸ್ವಭಾಷಿ ಇಲ್ಲದ ನೀನೆಂತಾ ಸ್ವಾಭಿಮಾನಿ

ಇಲ್ಲಿ ಲೋಭದ ಚೀಲ ತುಂಬುವ ಅನುಮಾನಿ

ವಿದೇಶಿಯಿಂದಲೇ ಧನಕನಕವೆಂಬ ಗುಮಾನಿ

ಅಂದು ಬಿಳಿ ಮಂದಿಯ ಅಧಿಕಾರದ ಎಂಜಲು ನೆಕ್ಕಿ 

ನಮ್ಮವರೇ ದೇಶವನು ಗುಲಾಮಗಿರಿಗೆ ತಳ್ಳಿ 

ಇಂದು ನಮ್ಮವರೇ ನಮ್ಮಗಳ ಭಾಷೆಯನು ಕುಕ್ಕಿ

ಪರದೇಶಿ ಮಾತನೇ  ಮೇಲೆತ್ತಿ ಬೀಗುವ ಮಳ್ಳಿ 

ನೀನೆಷ್ಟು ಅರಚಿ ಕಿರುಚಿದರೂ ಕರೆಯಲ್ಲ ಬಿಳಿಜಿರಳೆ 

ಎಡವಿ ಬಿದ್ದಾಗ ಹಿಡಿದೆತ್ತಿ ಅಪ್ಪುವುದು ತಾಯ ಕರುಳೆ

ತಾಯ ಮಾತನೇ ಅಲ್ಲಗಳೆವ ಮೂಢ ಮರುಳೆ

ಇನ್ನಾವಳನೋ ಅಪ್ಪುವುದರಲೇನು  ಹುರುಳೆ

ಅಲ್ಲಷ್ಟು ಇಲ್ಲಷ್ಟು ಅಷ್ಟಷ್ಟು ಹರಕು ತುಣುಕು

ಕೊಚ್ಚಿ ಮೆಚ್ಚಿದರೂ ನಿನ್ನದೊಂದು ಮಿಣುಕು

ಹೆತ್ತ ತಾಯ ಹೊತ್ತ ನೆಲವ ಮರೆವ ಕೊಳಕು

ಮೂಢ ಮಂದ ಪೊರೆ ಹರಿದು ಬೆಳಗಲಿ ಬೆಳಕು

ನೀವೆಷ್ಟೇ ಮರೆತು ಮೆರೆದರೂ ಮರೆಯೆವು ಕನ್ನಡ

ನುಡಿ ಬಳಗ ಸೇರಿ ಮೆರೆಸುವುದು ನಮ್ಮ ಸಂಗಡ

ತಿಳಿ ನೀ ಪಳಗನ್ನಡ ನಡುಗನ್ನಡ ಹೊಸಗನ್ನಡ

ಪರದೇಶಿಗಿಂತ ಹಿರಿಯ ಮೆರಗು ಬೆರಗು ಕನ್ನಡ